Qaybtii 9-aad Sheeko: Dhaawicii Qalbiga !! ( Sheeko ku saabsan qiimaha samirka & xanuunka qiyaanada)

 

                        Waxaa Qoray: Qoraa Sare Mowliid Xaaji Cabdi

Qaybtii 9-aad

Ducaale wuxuu u mahadceliyey Caaliyo sida ay u qaadatey go’aanka geesinnimada ah, unna samirtey wuxuu sheegay inaannu garan karin wax uu uggu abaalgudo balse wuxuu u soo qadimay in uu diyaar u yahay in uu furo Zakiya uunna Caaliyo ku qanciyo sidaasi, haddii ay ku tahay raali.

Caaliyo go’aankaasi way ka hortimid waxay sheegtey in aanay guriga ku imaan in la furo Zalika oo ilamahaasi meel cidlo ah ku soo dhacaan waxay xustey in ILAAHAY dartiis ay samir u qaadatey aynna diyaar u tahay in ay ku taageersto Ducaale nolashiisa, Zakiya-nna tahay qof lala qabo oo ay ixtiraam iyo wanaag u hayso si kasta oo aanay isku aqoon.


Ducaale inta istaagey oo uu labada gacmood kaga qabtey dhabadhanada Caaliyo ayuu wajiga ka dhunkaday wuxuu ku leeyahay “ Ma garan karo wax aan kuuggu abaalgudo, waxaan ahay qof dambi kaa galay oo nolashaada qalqal galiyey, waxaan ahaya kan la aaminay ee dayacay aaminnimadaas, waxaan ahay qof xun oo aan ku wanaagsanayn aaminaadda iga raali noqo, inna cafi, ILAAHAY-nna abaal iyo ajar ha kaa siiyo wanaaga iyo samirka”. Habeenkii sidaa ayaa lagu kala seexday oo qalbi iyo niyad isku caafimaad qaba ay weheliso.

Caaliyo oo labadeeda gacmood ku haysa gacmaha Ducaale korkeeda ayaa cod xabeeb leh ku tiri “Aamin xabiibi, Mahadsanid”.

Zakiya kaligeed ayey ku jirtaa qolka Isbitaalka ay ka jiifto waxaa u shidan Tv loogu tala galay in ay isku maaweeliso waxaa sidoo kale loo ogolyahay inay isticmaasho telefoonkeeda, waxaa soo wacaysa Cayni oo saacado ka hor ugga tagtey Isbitaalka waxay u wadaa war iyo xan daray ah (xan cusub), waxaa looga naxsaday in war iyo fadhi meesha aannu u oolin oo Caaliyo gurigii ku soo laabatey aynna heshiiyeen iyada iyo Ducaale, waxaa kale oo loo sheegay in caawa ay isla joogaan.

Zakiya dhiigeedda meel laga saro ma leh, carrada iyo xanaaqa ay qabtay awgeed waxaa laga dareemay qolka la socodka bukaanka (Patient Monitor Room), waxaa ku soo yaacay laba kalkaaliso waxaa laga warhelay in ay telefoon ku hadlayso si degan ayaa looga wareystey waxa ku dhacay waxay u sheegtay in war aanay ku farxnin loo soo sheegay, cabaar ayaa la dajiyey waxaa loo sheegay inay joojiso isticmaalka telefoonka aynna is ilaaliso maadama la ogaaday hadda in dhiigeedu uu kacay, taladii ayay qaadatey waxaynna damisay telefoonkii balse walwalka iyo sida xaalada nafteeda ku dambaynayso waxaa uga daran arrinta Caaliyo.

Xili saq dhexe oo hurdo macaan Caaliyo u baxayso ayaa Ducaale uu soo kacay wuxuu ku jiraa fakar, isagaa fadhiya ayaa Caaliyo indhaha kala qaaday waxay aragtey in Ducaale uu fakar ku jiro jiifka inta ka soo kacday iyadoo qaarka dambe wali ka jiifta balse inta sare la soo kacday oo dhabarka gacanta ka saartey Ducaale ayay leedahay “ Xabiibi maxaa kuggu dhacay oo aad xiligan u kacday ma xanuun ayaad dareemaysaa mise wali waxaa ku gubaya wixii aad igu sameysya, annigu sidaan kuu sheegay ILAAHAY samirkiisa ayaan kaashaday ee isdaji, iska oo jiifo saacadaha hurdada kaaga dhiman”.

Ducaale arrinta ay ka hadlayso Caaliyo waxaa u sii dheer dhibaatada haysata gaar ahaan Isbitaalka lacagta looga baahan yahay ee Zakiya subaxnimada lagu qalayo, lacagtii maxkamadu u qabatey ee 50-ka kun ee doolar oo waqtigii ay ka dhiman tahay 15 cisho iyo guri la’aanta iyo dhaqaalo la’aanta haysata ilmaha Zakiya.Isagoo hadal ugu jawaabin Caaliyo ayuu ugu baaqayaa inay iska seexato, laakiin Caaliyo way dareemaysaa dabeecada Ducaale marka ay wax ka qaldan yihiin waayo ku dhawaad 20 sano ayay nolasha wadaageen. Hadalkii ayay mar kale ku sooceliysay waxayna ka codsatey in uu la wadaago dhibka hurdadda u diiday.

Caaliyo qof wararka baadi goobta ma ahan wax badan oo aysan ogayn oo Ducaale iska badalay nolashiisa ayaa ka qarsoon gaar ahaan shaqadii in uu lumiyey, daynta lagu leeyahay, gurigii ilmaha Zakiya deganaayeen in lagala noqdey, maxkamadda lacagta ka sugaysa iyo lacagta Zakiya qaliinkeeda looga baahan yahay, intaasi oo xaaladood wax ay ka hayso oo xog ah ma jirto, balse Zakiya iyadoo Isbitaal ku jirta ayay wararkii ugu dambeeyey fadhiga ku helaysaa. 

Ducaale wuu ogyahay kalsoonida ay Caaliyo isku qabeen ka hor fashilkii Facebook-ga si cad ayuu uga sheegay Caaliyo xaaladiisa wixii la soo gudboonaaday ilaa maalintii ugu dambaysay ilaa iyo maanta, Caaliyo yaab iyo amakaag ayaa u yimid, si fiican ayay sariirta inta uga soo kacday oo ay ka soo istaagtey dhankii ay jiiftey oo ayay dhulka inta fariisatay ka soo horjeesatey Ducaale.

Wajigeeda waxaa laga dareemayaa yaab iyo waxoogaa walwal ah, iyadoo kor u soo eegaysa Ducaale ayay soo jilbo joogsatey daanka inta gacanta ka saartey ayay leedahay “Waxba ha walwalin Xabiibi anigaa garabkaaga jooga, ilamahayga Aabahoodow meel aan kaaga harayo ma jirto, subaxnimada waxa ugu horeeya waa in aad Bangigeyga ka soo bixiso lacagta qaliinka walashey Zakiya, qof aad wax u waydiin karto ma jirto iyo dayn aad raadin karto, lacagta maxkamadda 15-ka cisho waxaan ku bixinayaa inaan iibiyo dahabkeyga oo dhan, ama aan amaah (depotsit ) dhigo sharciga dhulalka banaan ee aan leeyahay, arinta ilmaha Zakiya guri kiro ah ku jiri maayaan, guri ayaan uga qaaday shirkadda cusub ee hadda bilwoday guryo dhisidda anigaa ayaa bixinaya bil kasta lacagta ilaa aad shaqo ka helayso, intaasi sow kaama qaadi karto walwalka iyo walbahaarka”?.

Ducaale wuu malaysan la’yahay hadalada Caaliyo sariirtii uu fadhiyey ayuu inta ka soo kacay oo uu Caaliyo isla soo simay ayuu labada gacmood ka soo qabtey wuxuu leeyahay “Qof kaa bini’aadamsan waligay nolasheyda arki maayo, ma aqaan waan ku iraahdo ama kugu tilmaamo waxaan dhihi karaa waxaad tahay caawimaad & raxmad ILAAHAY ii soo diray, ILAAHAY abaalkaaga ha kaaga dhigo Jannada aduunkana magac iyosharaf”.


Caaliyo waxay ugu warcelisay “Intoo kale Qalbi, waxba ma ahan waan isku leenahay wanaagga iyo isu gargaarida, waayo waa arrin Diini ah inaan is-kaalmeynno iskuna ixsaan falno”


Nabarkii walalka ayaa ka soo go’ay Ducaale, subaxnimadii intii aanu bixin ayay Caaliyo u diyaarisay Jeeg Bangi oo ay ku qoran tahay 10-kun oo doolar, waxay ugu talagashay lacagta inta kale in Zakiya isku baxnaaniso waayo Ducaale ayaa u sheegay habeenimadii innaanay shaqeyn, Ducaale 8500 wuxuu ku bixiyey Isbitaalka 1500 ee soo hartey wuxuu ugu riday Zakiya Boorsadeeda u taal qaybta wax dhigashada Isbitaalka.

Ducaale gaari la’aan ayuu ahaa waxaase Caaliyo ay siisay furaha baabuurkeedii iyaduna waxay sheegtey in isticmaalayso gaadiidka dadweynaha ee basaska, markii ay tagtey shaqadeedii Kalkaalisnimada Isbitaalka gaarka loo leeyahay ee ka mid ah Isbitalada ugu casrisan dunida ee lagu sameeyo qaliimada wadnaha (Department of Cardiothoracic Surgery), waxaa xafiiskeeda u taal waraaq wargalin ah oo loogu sheegayo in ay ballan la leedahay Gudiga maamulka Isbitaalka galabta 3-da galabnimo.


Ma oga balantu waxa ay ku saabsan tahay waxaase ay qabtaa walwal ku aadan shaqadeedda saacada ayay haddba eegaysaa ma garan karto waxa lagu orran doonno saacadii balanta markii la gaaray waxay tagtey xafiiska maamulka Isbitaalka (board of Directors), waxaa miis wareegsan fadhiya 7 xubnood oo Isbitaalka gudiga maamula ah oo ay ku jiraan 4 qofta ee iska leh Isbitaalka , qof markii dambe ay ogaatey in uu yahay Qareenka Isbitaalka (Lawyer), Hantidhawrka (Auditor), iyo madaxda waaxyaha Isbitaalka.

 Waa Socotaa.......

Qaybta midig ee blog-ga ka dheeho qaybaha kale ee sheekadan adigoon ka bixin boggan, haddii ay macquul noqoto waxaan ku talo jiraa inaan buug iyo filim ka sameeyo qisada sheekadan idinka ALLE.


Fiiro gaar ah: aragtidaada ku aadan sheekadan qaybta hoose ee falcelinta (commens-ka ka soo qor ra'yigaagu waa muhiim.


Waad mahadsantihiin: