Summad ma isku yeelnaa ? (Sheeko dhexmartey Warfaa & Warsame) Kaftan siyaasadeed:

                                                        Qalinka: Mowliid Xaaji Cabdi

Warfaa & Warsame waxay hoos taagan yihiin geed Higlay ah harkiisa waa goor barqo ah oo cadceeddu falaaro kulul cirka ka soo daynayso, waxay ka sheekaysanayaan xaaladaha siyaasadeed ee uggu dambeeyey ee dalka gaar ahaan doorashooyinka madaxtinimmo ee noqday tusbax afka laga furay, samaysashada callamo goboleed, dhismaha maamul goboleedyo & khilaafyo siyaasadeed oo ay Idaacadaha ka dhageystaan kana daawadaan telefishinada.

Warsame oo ul bakoorad ah uu watay ku satiicsan ayaa go’ii uu watey garabka midig inta ka qaaday kan bidix isagoo saaraya wuxuu leeyahay;

“Warfaayow intaan tuuladan taagnayn ee aan Geel baxsaday iyo col aan ka sheekaynaynay raggii asaageen ahaa futushaariyo ayay inta tosheen waxay noqdeen dibutaati (xildhibaan), ee ninyahow sidan xal ma ahan Geellan baas ee aad ilaallinayso ee wiilashii kaaga dhamaadeen inta xaraashto innaga keen meesha oo ha nalaga daawado Filimaanta ( wuxuu ula jeedaa Telefishinada ama idaacadaha la iska arko)”.

Isagoo hadalkii dhamayn ayaa Warfaa oo Ookilyaal madow oo madaxa qayba hore u saarnaa oo uu 10 sano kahor ka soo iibsaday magaalada Cadan inta soo qabsaday cimaadada geesteeda ku tirtiraya wuxuu hadalkii ka qaatay Warsame isagoo leh;

“Warsamow war lagu sii, adigu waxaad ka sheekaynaysaa inaan tuuladan inta ka tagno dibutaati noqono xaggee caqligu kaa jiraa?  Yaa innaga xil iyo darajo inoo dhiibanaya rag iyo dumar England & Paaris iyo meelo kala oo Mareykankan ka mid tahay ka soo yaacay oo Diyuusbaro (qurbo-joog) ayaa darajo kasta qabasaday’e maxaan xil doonaannaa ma suuqa xoolaha ayaan ka noqonayaa dullaaliliin”.

Warfaa saameyn ayuu ku yeeshay hadalka Warsame oo wuxuu la socdaa wiil uu adeer u ahaa oo beri dhexe u dhoofay England oo hadda dalka inta ku laabtay dibutaati noqday ka dibna isu sharaxay Madaxweyne, isagoon hadlin ayuu wuxuu bilaabay inuu kaligiis hoos isula hadlo, dhulka isagoo fiirinaya labada lugoodna is-dhaafinaya wuxuu qalbiga iska leeyahay;

“Haddaan warka Warsame u dhagraariciyo oo aan ka qayb ka qaato oo kaligay inta golihii geella dhex tago oo anniguba sameysto maamul goboleed maxaa ii diidaya, oo waliba maan ula baxo Golle-geel state of Somalia”.

Isla sheekaysigii isagoo dhamayn ayaa Warsame wuxuu leeyahay “Maxaad ku fakaraysaa oo dhulka la fiirinaysaa ?”, geeso lo’aad kulaylkaa lagu gooyaay’e go’aan innoo keen”.

Warfaa hadal uu la yaabay ayuu ku leeyahay Warsame isagoo si fiican indhaha ugu soo eegaya ayuu yiri  “Waa yahay’e aniga I dhagayso laga bilaabto manta waxaan ahay madaxweyne adigu dibutaati ayaadba ka hadlaysaay’e annigu madaxweynaha Golle-geel State of Somalia ayaan sameysanayaa adiguna haddaad doonto Golle-geel land state of Somalia samayso, laakiin sharuud waxaa ah inaadan igu qabsan calanka aan samaysan doono”.

Warsame yaab ayaa ka soo haray! Ma aannu filayn in uu sidaasi ilbax u yahay Warfaa oo inta tuulada ka tago, dibutaatina ka talaabsado madaxeyne isu caleemo saaro, su’aal deg deg ayuu ku soo tuuray wuxuuna waydiinayaa;

“Maba xuma damacaaguy’e waxaan ku su’aali lahaa maxaan calan uga baahan tahay maad kii Soomaaliya ee laga kala yaacay adigu iska qaadatid oo golaha geella dhexdiisa ka taagatid?”

Warfaa wax uusan ka filayn ayuu ugu jawaabay Warsame wuxuuna yiri “Ninyahow waxana kaaga yaabay ma kaa doqonimaa mise waa qalbi la’aan , war hadda miyaadan ogayn in Geelleennu uu lahaa sumad lagu garto oo uu kaga soocnaa geella kale, hadda waa sidii oo kale oo sida Geellii ayaan la doonayaa in dadka reer kasta sumad loo sameeyo, marka maxaa aniga iilla soo aadaysaa calanka buluug ah illayn sumadeyda lamaba yaqaan’e,  waa inaan suuqa inta tago dhawr maryood oo midabo kala duwan leh harqaanka la tagaa oo la ii tolaa, markaas tolkeygu waxay yeelan doonaan summad lagu garto oo ay uga duwan yihiin dadka kale”.

Warfaa oo hadalkii dhamayn ayaa waxaa qosol la dhacay Warsame dhag…dhag..dhag, qax…qax…qax…qax…qix…qix…qix…qix isagoo qosolkii wali baaqi ku sii yahay ayuu yiri “Oo hadda ma sida aan xoolaha u suntan jirnay oo Geella aan sumad qoorta iyo dhinacyada dab ugala dhici jirnay ayaad leedahay dadka aan sumad u sameynno si loogu kala aqoonsado?, war ninyahow nin qatar ah ayaadba tahay’e sidee ku keentay fikirkan?”.

Warfaa wuxuu ugu jawaab celiyey Warsame “Anigu ma keenin ee in la is sunto ayaa keentay ee sumadaada gees ula bax adigoo is-cadeynaya, haddii kale meel aad ku abtirsato lama yaqaan oo sumad laawe ayaad waligaa ahaanaysaa.

Warsame wuxuu u jawaabayaa Warfaa “Haddii aad garatay inaan summadayda sida Geellii la igu garto dadkeygaan dhinac ka raacayaay’e waa inaan aniguna Madaxweyne isku magacaabaa calan ka taagtaa Balligii reerku deganaa ogownna hadda dhururuq biyo ah iima soo doonid kartid iskaba daa cantoobo sonkor ah’e.

Sidaa ayaa lagu kala tagay iyadoo balantu noqotay in summad la sameysto !!

Sheekadan waa kaftan siyaasadeed oo ka turjumaya xaalka siyaasadeed ee dalkeenna ka jira, ha u qaadan mid ku socda qoys, qof ama bulsho waa wax taagan oo aan la iska indho intiri karin u fahan, haddii aad ka xanaaqdo adiga ayaa toosha isku shiday annigu kugma shidin.

Fikirta xorta & dooduhu waxay dhisaan garaadka, waxay horsed u noqdaan in loo dodo si cilmiyan ah.

Mahadsanidiin: